Frank Engel (CSV)

Kandidat EU-Walen 2009
Dieses Profil dient zu Archivzwecken, eine Befragung ist nicht mehr möglich. Besuchen Sie das aktuelle Profil.

Här ,

ech si prinzipiell Äerer Meenung: Europa bräicht eng Sprooch, déi all Europäer géif léieren, an an däer e kéint e kéint mat all anerem Europäer schwätzen a kommunizéieren, wéi eng Mammesprooch och ëmmer déi Betraffen hätten.

Vun Esperanto als Kommunikatiounssprooch halen ech net alles: et ass eng kënschtlech Sprooch, déi sech nie konnt duerchsetzen, an trotz hirer "Einfachheet" (ech hat emol probéiert, mech do drunn ze ginn, dat geet zimlech gutt) nie op breeder Basis enseignéiert a geléiert gouf. Dat gëtt wuel och an Zukunft näischt.

Englesch ass faktesch déi Sprooch, déi wuel bal iwwerall um Kontinent enséignéiert gëtt, meeschtens ewell als éischt Friemsprooch. Loosse mer dat emol nach eng Grimmel zéien: ech mengen, do kënnt et vum selwen derzou, datt irgend eng Kéier bal all Europäer, wa soss keng Sprooch passt, a méi oder manner guddem Englesch wäert kommunizéieren. Wéi gesot, méi oder manner gutt. Well dat "Kommunikatiounsenglesch", wat haut dacks gepotert gëtt, ass wäit dervun ewech, irgend ee Räichtum am Discours ze vermëttelen. Ëmmerhinn: méi a méi Leit versti sech esou besser, wéi s´et kéinten, wa se guer keen Englesch géife beherrschen.

Ech mengen allerdings virun allem, datt ee keng "gemeinsam Sprooch", wéi Dir dat nennt, ka forcéieren an de Leit opdrängen. Europa ass net esou, an et funktionéiert net esou. Mir hunn nun eben emol all déi Sproochen, déi mer hunn, a mir sollten déi pflegen an houfreg drop sinn. D´Effore vun der Kommissioun an de Memberstate vun der Unioun, fir hir Schoulsystemer esou auszeriichten, datt prinzipiell all Jonke soll zwou europäesch Friemsprooche léieren, fannen ech séier richteg. Well Europa ass a bleiwt méi wéi Englesch, an ech wir frou, wann e Slowen an en Hollänner och kéinten z.B. Däitsch matenee schwätzen, an e Lëtzebuerger an en Rumän Franséisch. Firwat soll net irgend eng Kéier och den Eisträicher mam Tschech eng slawesch Sprooch schwätzen - déi daachen als Kommunikatiounsvehikele grad esou vill, wéi germanescher a romanescher. Esou oder esou: mir brauchen e puer (net just eng) grouss Kommunikatiounssproochen um Kontinent, déi all Europäer zougänglech sinn. D´Entwécklung geet an déi Richtung, loosse mer se mol nach e bësse goen!

Bescht Gréiss,

Frank Engel

Jo, ech hu mech mat Esperanto an anere "kënschtleche" Sprooche beschäftegt. Ech wollt keng ofleenend Haltung géigeniwer vun deene Sproochen hunn, ouni ze wëssen, wat se eigentlech sinn.

Jo, ech mengen, datt mer d´Kommunikatiounsproblemer, souwäit se bestinn, an de Grëff kréien duerch resolut Léiere vu Friemsproochen iwwerall an Europa. An zwar am léiwsten net nëmmen eng Froemsprooch, mee e puer.

Nee, ech mengen net, datt Englesch "déi bescht Léisung" ass. Et wäert awer déi sinn, déi sech duerchsetzt. Mir kéinten och Chinesesch, Hindi oder Russesch probéieren. Dat wäert awer net klappen.

Ech gesinn esou Virdeeler net. Natierlech si se "formell" bekannt: Esperanto ass immens einfach, séier ze léieren an et bevirdeelegt keen, well et kengem seng Mammesprooch ass, a jiddereen et misst léieren. Et wäert awer wuel net esou sinn, datt op eemol eng hallew Milliard Europäer a sechs an eng hallew Milliard Leit uechter d´Welt wëllen onbedéngt eng Sprooch aus dem Labo léieren. Dat wäert ganz einfach net stattfannen.

Ech wousst net, datt ermëttelt ginn ass, datt dat eent aacht mol méi deier wir, wéi dat anert. An dach. Ech sinn an ech bleiwen derfir, datt mer Sprooche léieren - Englesch an och anerer - déi eng Geschicht hunn, eng Kultur, eng Literatur a virun allem e Liewen. Wee wëllt Esperanto léieren, soll dat selbstverständlech maachen. Mee datt Europa sech soll an extrem basescher Form an enger Retortesprooch verstännegen, wir eng Reduktioun vun der kontinentaler Diversitéit, déi net nëmmen onsënneg wir, mee ganz einfach schrecklech schued. Et wäert och net stattfannen.

Dëst ass keng Ausso "géint" Esperanto. Ech hunn näischt géint Esperanto, am Géigendeel. Mee ech sinn dervun iwwerzeegt, datt Mënschen a liewegen, reelle Sprooche solle matenee schwätzen a schreiwen, wou e Begrëff méi wéi eng Bedeitung kann hunn a wou et Freed mécht, eng Sprooch besser kennenzeléieren. Dir kënnt kee Shakespeare, mee Molière, kee Schiller a keen Dante op Esperanto derzou bréngen, datt se Iech bewegen. Dat kënnen se nëmmen a richtege Sproochen, geschriwwen an geschwat vu Leit aus Fleesch a Blutt.

Mat beschte Gréiss,

Frank Engel

Här ,

schéin, datt Der mäi Bichelche gelies hutt!

Wann ech vun europäeschem Houfert schwätzen (oder schreiwen), da mengen ech ebe genee d´Iwwerwannung dervun, datt mer ëmmer nëmme par rapport zu eiser respektiver eegener Natioun raisonnéieren, an datt mer et eng Kéier musse packen, dat och als Europäer ze maachen. Institutionell betruecht ass et esou, datt Kommissioun a Parlament dës "Denkweis", wann ech et esou ka nennen, am Géigesaz zum Ministerrot schon hunn: Kommissären däerfen nëmmen am Sënn vum europäesche Gemengwuel handelen (ob s´et an alle Fäll och esou maachen, bléiw natierlech ze beweisen), an am Parlament sinn déi europäesch Parteien a Fraktiounen als Referenzkader op d´mannst grad esou wichteg, wéi d´Land, aus deem en Deputéierte kënnt. Natierlech hu mer all all eege Virstellung vun Europa, vun deem, wat et ass, a vun deem, wat et soll sinn. Mee doraus ka sech menger Meenung no duerchaus erginn, datt mer déi Virstellungen eng Kéier zesumme leeën an eppes gemeinsames Europäesches draus maachen. Ëm d´Joer 2050 wäert et an der Welt nach knapps 10 Prozent Europäer ginn - mir sinn demografesch schwaach a wäerten et wuel bleiwen. Wann een da nach wëllt um Planéit matspillen, da kann een dat nëmmen zesummen. Suguer 80 Milliounen Däitscher, alleng a fir sech, verschwannen do an der Mass. Iwwer eng hallew Milliard Europäer, déi zesummen handelen (a vläicht suguer denken a plangen) kréien dat scho besser hinn!

Zur Petrolsförderung: ech menge prinzipiell, datt mer alles mussen drusetzen, fir kuerzfristeg Energieperspektiven ausserhalb vum Petrol ze entwéckelen. Dat geet natierlech besonnesch gutt do, wou eng bestëmmte Kompetenz an Erfarung zum Beispill a Saachen erneierbar Energien existéiert - wéi an Europa. Wand, Sonn an aner sou Energiequelle si nach laang net ausgeschäfft, a si musse konsequent erschloss ginn. Perséinlech mengen ech och, datt mer net laascht Atomenergie kommen, mee dat ass eng aner Diskussioun. Wat muss verhënnert ginn, ass, datt an 3, 4 Joer Petrolspräisser 150 oder 200 Dollar de Barrel bedroen, wat onweigerlech zu enger gréisserer Wirtschaftskris géif féieren, just well de gemeinsame Bedaarf vun entwéckelter an entwéckelnder Welt zu deem Zäitpunkt net méi kéint verstänneg gedeckt ginn. Erneierbar Energiequelle sinn och fir dee nach méi aarmen Deel vun der Welt eng méiglech Akommesquell. Mir missten et fäerdeg bréngen, datt d´Erschléissen an dat konsequent Notze vun de Potentialitéiten an dësem Beräich zu engem Deel vun der globaler Entwécklungspartnerschaft gëtt - vun Europa inspiréiert an orientéiert.

Mat beschte Gréiss,

Frank Engel

Léiwen Här ,

ech mengen tatsächlech, datt ech hätt solle soen a schreiwen, mir wiren ELO nach zu 10 Prozent, Tendenz falend, a mir wäerten a 50 Joer bei 7 oder sou landen. Dat mécht meng Aussoen net manner wouer - am Géigendeel.

Erweideren op Russland an doriwwer eraus, am aktuelle Sënn vum Wuert, kënne mer net. Dat géif e Konstrukt, dat kaum nach ee Meeschter géif, an d´Leit géifen et och net akzeptéieren. Allerdings misste mer et fäerdeg bréngen, ënner Mobiliséirung vun enger gréisserer Dosis Kreativitéit, eng besonnesch Zort vun Associatioun an den eurasesche Raum eran ze praktizéieren. Esou sinn ech der Meenung, datt ee Russland (a vu mir aus och Kasachstan etc., wann déi intresséiert wiren, an de Kaukasus souwisou) sollt a verschidde politesch Deeler vun der europäescher Beschlossfaassung integréieren. An anere Wieder: Aussen- a Sécherheetspolitik, zum Beispill, kéint an engem Conseil, wou och Russland drunn deelhëllt, beschloss ginn. Energiefroen och. Ëmweltpolitik kéint a sollt esou koordinéiert ginn. Eventuell kéint een esouguer (ass e bësse gewot, mee bei Iech däerf ech dat jo!) déi sougenannt "Mëttelmier-Unioun" an esou eng neiaarteg politesch Beschlossfaassung versichen, ze integréieren. Déi geostrategesch Plus-Value wir gewalteg. Wéi gesot, et ass gewot, mee wa mer déi Unioun schon hunn, da sollte mer och versichen, eppes Sënnvolles dermat ze maachen, jenseits vun e puer schmocke Sommet´s-Fotoen zweemol d´Joer.

Alles an allem kéime mer esou op ëm eng Milliard Mënschen, déi an eng gemeinsam Politikgestaltung agebonne wiren. Dat géif an der Welt natierlech eng Roll spillen. Et géif doriwwer eraus Europa an déi arabesch Welt op erhiewlech Manéier rapprochéieren, an et géif Russland, wat en aalt europäescht Land war, laang ier et en asiatescht gouf, an déi europäesch Saachen abannen. Wéi gesot, net als Member vun der Unioun, déi mer haut kennen, mee als Member vun enger neier Zort Koordinatiounsstruktur a wesentleche Froe vun der globaler Politik.

Mat beschte Gréiss,

Frank Engel

Här ,

dat, wat Dir beschreiwt, gëtt (esou oder liicht ofgewandelt) ëmmer nees vu Leit beschriwen, déi versichen, hiert Geschäft an der Groussregioun ze bedreiwen. Mir fërderen dat jo an ënnerstëtzen et och vu lëtzebuergescher Säit - just datt verschidden national Regelunge bei eisen Noperen dat nu definitiv net méi einfach maachen.

Ech mengen, datt et definitiv Zäit gëtt fir en europäesche Kader, dee bestëmmt, datt e Betrieb, deen an engem Memberstat däerf eng bestëmmten Aktivitéit ausüben, dat ouni weidert Gedeessëms och an engem aneren däerf. Dat selwecht muss gëlle fir Onofhängeger, déi hir Aktivitéit ouni Gesellschaft rondrëm ausüben. Vu mir aus sollen dann op europäeschem Niveau Mindestufuerderunge beschriwe ginn, un déi sech ze halen ass, fir datt ee kann an der ganzer Unioun seng Tätegkeet entfalen - mee et muss een et endlech kënnen! Deen Zoustand, deen Dir beschreiwt, ass onhaltbar - grad esou wéi deen, deen derzou féiert, datt Leit net kënnen ongestéiert zu Athus op engem Maart hir Wuere verkafen. Et ass eng Fro vun der Koordinatioun vun de Konditioune vun der fräier Erwerbstätegkeet. Déi ass absolut onzoureechend, an ech wéilt mech selwer staark derfir asetzen, datt dat sech ännert. Mir kënnen net vun Europa schwätzen, wa Betrieber an Entrepreneuren dräi Kilometer hanner eiser Grenz onméiglech kugenéiert ginn, wa se wëllen dat maachen, wat selbstverständlech misst sinn, nämlech an der Groussregioun schaffen.

Mat beschte Gréiss,a Merci fir Äer gutt Wënsch,

Frank Engel