Léiwen Här
,
Villmools Merci fir Är Fro vum 14. Abrëll iwwert déi Pisten déi d’Regierung der Tripartite ënnerbreet huet fir de Budgetsdefizit nees an de Grëff ze kréien.
Ech wëll hei net laang drop agoen, datt dat Ideeë fir eng oppen Diskussioun waren a nach keng fäerdeg ficeléiert Decisioune vun der Regierung. Komme mer direkt zum Fong vun der Fro.
Dir maacht Iech Gedanke well d’Regierung haaptsächlech deene klenge Leit d’Laascht vun de Spuermoossname géing opdrecken. Ech kann Iech berouegen. D’Regierung ass sech dees Problem bewosst gewiescht an huet vu vireran speziell dorobber opgepasst. Leider ass awer vill vum Detail vun deene verschiddene Mesure verluer gaangen wéi se bis kommentéiert gi sinn.
Huele mer als Beispill d’Allocation de rentrée scolaire, dat zousätzlecht Kannergeld wat am August ausbezuelt gëtt. Der Regierung hier Propos ass, datt dës Allocatioun net méi un all Famille geet, mä just nach un déi déi et wierklech brauchen. Fir Äert Beispill ze huelen: eng Famill déi just de Mindestloun oder, bei zwee Kanner, och nach zweemol de Mindestloun huet, wäert déi Suen och weider kréien.
Wat d’Kannergeld no 21 Joer ugeet, ass et och net sou, datt d’Regierung einfach proposéiert hätt dat mir näischt dir näischt ze sträichen. Et gouf vun Ufank u kloer gesot, datt et parallel géing méi Suen als Bourse an/oder Prêt géing gi fir d’Studenten. Et geet eben drëm ze verhënneren, datt iergendee Jonken aus renge Geldsuerge raus net kéint studéiere goen. Et kann ee sécher soen, datt d’Studenten da no hirer Universitéit eventuell Schold wäerten hunn. Mee ass et wierklech e Problem wann en Dokter, deen duerno jo net fir nëmmen de Mindestloun wäert schaffen, muss dem Staat en Deel vun deem wat seng Studie kascht hunn zeréck bezuele muss? Ëmsou méi datt, wéi och lo, hien duerfir e speziell gënschtege Prêt kritt an en plus d’Zeréckbezuelen iwwer 10 Joer strecke kann.
Och beim Logement huet d’Regierung opgepasst, datt et grad net déi äermste Stéit trëfft. Wa mir d’Bonification d’intérêts wëllen ofschafen ass dat jo grad well och Leit déi 6, 7 an 8 000 Euro de Mount verdéngen déi kréien. Déi kleng Leit kréien dogéint eng aner Hëllef, déi Subvention d’intérêts heescht. Wien de Mindestloun verdéngt wäert also keen Euro verléieren a vun der Ofschafung vun der Bonification d’intérêts mol näischt matkréien. Déi déi méi verdénge wäerte lues a lues manner gehollef kréie wéi se méi verdéngen. Dat ass sou wéi et soll sinn. An dat ass och wat d’Regierung an der Tripartite proposéiert huet. Beim bëllegen Akt ass et iwwregens genau d’selwecht. Och hei ass net proposéiert en ofzeschafen, mä e just nach deene Famillen ze ginn, déi net sou vill verdéngen.
Dir gesitt, d’Regierung ass sech bewosst, datt ee net ob d’Käschte vun deene Schwächsten an eiser Gesellschaft soll probéieren de Budget nees an d’Riicht ze kréien.
D’Politik vun der Regierung ass e Ganzt. Mir wëllen do spuere wou et ze verdroen ass. Mir wëllen do d’Steieren an d’Luucht setze wou et déi breetste Schëlleren trëfft ouni awer hinne Lëtzebuerg ze vergraulen. Mir wäerte manner Investéieren, mä net radikal ofbremsen. D’Solidaritéit wäert weider spillen zu Lëtzebuerg. Si muss awer och an anere Beräicher spillen. Eis Entwécklungshëllef zum Beispill hëlleft deenen Äermste vun deenen Äermsten. Et ass ze einfach lo, wou mir spuere mussen, einfach ze soen déi sollen eleng eens ginn.
Mat beschte Gréiss,
Jean-Claude Juncker
Staatsminister
