Jean-Claude Juncker (CSV)

Abgeordneter Chamber

Léiwen Här ,


D’Idee vun engem "Wunngeld" gëtt vu verschiddene Säite vertrueden, huet awer net ëmmer déi selwecht Bedeitung. D’Grondidee besteet doranner d’Kannergeld rofzesetzen an déi Suen ze gebrauche fir e Wunngeld ze finanzéieren.

Déi eng argumentéieren, datt ee Wunngeld just misst u Résidente bezuelt ginn. Ech deelen déi juristesch Analys net. E Wunngeld géing virun den europäesche Gesetzer gerad sou wéi Kannergeld ugesi ginn a wier u jiddereen ze bezuelen deen hei am Land schafft a Steiere bezilt.

Fir anerer geet et éischter drëm d’Wunngeld sou unzepassen, datt déi méi héich Wunnengskäschten hei am Land par rapport zu de Nopeschregioune mat an d’Iwwerleeung geholl géinge ginn an d’Wunngeld selektiv gestaffelt géing ginn. Et ass awer eng Illusioun ze mengen, datt een déi Staffelung am Kader vun den europäesche Gesetzer kéint sou gestalten, datt jidderengem deen zu Lëtzebuerg wunnt de Montant X als Wunngeld ausbezuelt géing ginn, an datt déi déi hei schaffe mä ausserhalb vun eise Grenze wunnen näischt kréichen.

Wann ee sou e System wéilt aféieren, misst een objektiv Critère gebrauchen, zum Beispill d’Wunnengspräisser am Kanton. Dat géing mat sech bréngen, datt d’Kannergeld gekierzt géing gi fir jiddereen, mä datt eng Famill déi an der Stad wunnt méi Wunnengsgeld kréich wéi eng Famill déi am Eislek wunnt, well d’Heiser an d’Loyeren do net sou deier si wéi an der Stad. Vu que datt d’Wunnengskäschten am groussen a ganzen ëmmer méi rofgi wat ee méi wäit vun der Stad weg ass, datt vill Leit awer an de Stad a ronderëm schaffen, hunn dës Leit awer méi héich Käschte fir ob d’Aarbecht ze kommen a brauchen och méi Zäit dofir. Trotzdem géinge si duerch manner Kannergeld bestrooft ginn.

Dëst erkläert, firwat ech vun der Idee vun engem Wunngeld wéi et mat Momenter proposéiert gëtt, net iwwerzeegt sinn.

De Logementsminister Marco Schanck schafft awer un enger Mesure vu Wunngeld, dat an der Zäit limitéiert u Leit ausbezuelt géing ginn déi duerch e spezifesche Schicksalsschlag punktuell schlecht dru si fir hinnen ze hëllefen iwwer d’Ronnen ze kommen.


Mat beschte Gréiss,

Jean-Claude Juncker

Staatsminister

Bis elo as nach keng Äntwert agetraff. Fir eng Noriicht ze kréien, wann eng Äntwert antrëfft, gitt Är e-Mails Adress iwwert d\ Benoriichtegungsfunktioun hei ënnen un.

Bis elo as nach keng Äntwert agetraff. Fir eng Noriicht ze kréien, wann eng Äntwert antrëfft, gitt Är e-Mails Adress iwwert d\ Benoriichtegungsfunktioun hei ënnen un.

Bis elo as nach keng Äntwert agetraff. Fir eng Noriicht ze kréien, wann eng Äntwert antrëfft, gitt Är e-Mails Adress iwwert d\ Benoriichtegungsfunktioun hei ënnen un.

Op dës Äntwert waarde bis elo 4 Interesséiert

Léiwen Här ,

Déi sougenannte Krisecontributioun vun 0,8% ob alle Revenue vun där Zomm un déi iwwert dem Mindestloun läit, gouf Enn 2010 fir d’Joren 2011 an 2012 agefouert. Dës Steier huet d’Spezifissitéit, datt si explizit just fir zwee Joer agefouert ginn ass.

Wéi am Hierscht 2008 fir d’éischt d’Finanzkris iwwert den Atlantik an Europa eriwwer komm ass a se sech duerno an eng allgemeng Wirtschaftskris entwéckelt huet, woust d’Regierung, datt dëst net ouni Konsequenzen ob d’Staatsrecette géing bleiwen. D’Regierung huet awer ganz bewosst eng sougenannten anti-zyklesch Budgetspolitik verfollegt, an d’Ausgaben net nëmmen net agefruer, mä en plus – speziell bei den Investissementer – erop gesat. Donieft gouf et och méi Ausgabe beim Chômagegeld an anere sozialen Hëllefstellunge fir déi Leit déi direkt ënnert der Kris gelidden hunn. Duerch déi Méiausgaben, war et méiglech de Misère deen duerch Kris bedéngt war a Grenzen ze halen an och Aarbechtsplazen, déi soss verschwonne wieren, ze erhalen.

Dës Politik, déi an der Kris déi richteg war, huet – ouni Iwwerraschung – zu Defiziter gefouert. Am Joer 2008 konnt de Budget vum Gesamtstaat nach mat engem Excedent vun 1,2 Milliarden Euro ofgeschloss ginn, och wann den Zentralstaat (also ouni d’Sécurité sociale an d’Gemengen) schonns am Defizit war. An de Joren 2009 (-348 Milliounen Euro) an 2010 (-710 Milliounen Euro) huet dunn och de Gesamtstaat mat engem Defizit ofgeschloss. Déi aktuell Projektioune vun de Regierungsexperte ginn dovunner aus, datt och déi nächste Joeren mat Defiziter ofschléisse wäerten. De Budget vum Zentralstaat wäert 2011 wuel fir d’drëtt Joer hannerteneen iwwert eng Milliard Euro Defizit maachen.

Wéi Dir richteg schreift, si mir duerch dat déifste Lach vun der Kris duerch. Och wa mer vu wäit hierkommen a wa mir zumols beim Chômage nach vill ze schlecht Zuelen hunn, ass et am Joer 2011 Zäit fir de Bilan vun der Anti-Krisepolitik ze maachen a sech nees em e gesond Gläichgewiicht vu Recetten an Dépensen ze këmmeren. Och wann et nees besser geet, wiisst dat normalt Steierakommes awer nach net genuch fir d’Ausgaben nees all ze decken. Do wou mer mëtten an der Kris méi ausginn hunn, musse mer duerfir elo kucken nees méi eranzekréien. Dëst ass woufir d’Regierung ënner anerem och d’Krisecontributioun agefouert huet als eng Mesure déi an der Zäit begrenzt dozou bäidroe soll, datt dës Generatioun net déi nächst ob engem Scholdebierg sëtze léist.

Mat beschte Gréiss,

Jean-Claude Juncker
Staatsminister