Lucien Lux (LSAP)

Kandidat Chamber 2009
Dëse Profil dengt zu Archivzwecken, eng Befroung as net mei meiglech.

Här ,

Villmools Merci fir ären Ureegungen. Ech wéilt als éischt präziséieren dass, au contraire zu verschiddenen aneren Länner, déi lëtzebuergesch Verschrottungsprime un eng Réi vun strengen Emweltkritèren gebonnen ass. Des Kritèren betreffen net nemmen den CO2-Ausstouss, mä och d´Feinpartikelemissiounen. Et ass also kloer dass dës Moossnam, niewent dem wirtschaftlechen Aspekt (fir den Handel, awer natierlech och fir de Bierger den duerch e méi spuersamen Auto mettelfristeg vill Suen spuere kann), däitlech zu enger Reduktioun vun den Treibhausgasemissiounen an zu enger Verbesserung vun der Loftqualitéit bäidréit.Russpartikelemissiounen vun engem Diesel Motor aus den 90 er Joeren sin oft 10 bis 20 Mol méi héich wéi déi vun engem neien Auto mat Partikelfilter. Och bei den Steckoxydemissiounen get eng wesentlech Verbesserung par rapport zu eeleren Autoen erreecht.

Fakt as och datt den Undeel vun de spuersamen Autoen (CO2-Emissiounen net méi héich wéi 120 g/km) sech zënter der Aféierung vun den Primen car-e an car-e plus quasi verduebelt huet. Och bei den Duerchschnetts-CO2-Emissiounen vun den Nei-Immatrikulatiounen as zënter 2006 eng staark Tendenz no ënnen (-13 g/km) ze erkennen, waat sécherlech op d???Kombinatioun vun Subventiounen, CO2-orientéierter Autostéier, Kyoto-cent, a selbstverständlech och engem méi emweltbewossten Handelen vun allen Bierger zou zeschreiwen as.

Mat beschten Gréiss

Den Emweltminister
Lucien Lux

Här ,

Merci fir är Ufro zum Thema Wandturbinnen am Wahlprogramm vun der LSAP.

D´Notzen vun erneierbaren Energiequellen ass fir d´LSAP e wichtegt Element vun enger moderner an intelligenter Energiepolitik. Wéi soss, wa mer net erneierbar Energiequellen entwéckelen an Energie spueren, kënne mer méi onofhängeg vun Uelech- an Gasimporter, a vun héijen Energiekäschten ginn?

D´europäesch Unioun huet sech zum Ziel gesat, den Undeel vun erneierbaren Energien um Endenergieverbrauch op 20% bis 2020 ze héigen. Fir Letzebuerg ass een Ziel vun 11% fesgehalen ginn. Wëll mer haut bei 3,8% Stroumproduktioun aus erneierbaren Energië stinn, a bei 2% vum Endenergieverbrauch (Stroum, Wäermt a Bensin), musse mer nach grouss Ustrengunge maan fir dat Ziel ze erreechen.

D´Wandkraaft spillt do eng wichteg Roll. Dir frot mech, wéi mer daat géint de Widderstand vun deene Concernéierten duerchsetzen?

Dozou wëll ech emol bemierken, dass och bei anere Projeten, wéi de Stroossebau an dem Bau vun enger Industrie, oder esouguer neiem Wunnengsbau, net ëmmer jiddereen domadden averstanen as.

Wa mir awer net op héig Léin a Renten, an eng gudd Sozialversëcherung wëlle verzichten, musse mir eis kënnen weider entwéckelen.

Bei Handturbinneneprojeten as et esou, dass déi concernéiert Gemeng eng Baugenehmigung muss austellen. Zousätzlech hu mir eng Kommodo- Inkommodo-Prozedur, am Kader vun deeër z.B. dem Impakt op d´Planzen- an Déieren muss evaluéiert gin, an och eng Schiedétude (Schattenwurf) a Kaméidiétude erstallt gin. Nëmmen an deene Fäll, ou kee groussen negativen Impakt festgestallt gët, an all Kritären agehaalen gin, kann eng Wandturbin opgestallt gin.

Ech hoffen awer, dass et zu Lëtzebuerg nach genuch Leit gëtt, déi verstinn, dass mir eng modern Energiepolitik brauchen.

Mat bëschte Gréiss,

Lucien LUX
Emweltminister

Madame ,

Merci fir Déi Fro, di esou muenchen Automobilist beschäftegt.

Well awer, wéi oft fälschlecherweis geduecht gëtt, d´Kompetenz un eisen Stroossen an Autobunnen beim Bauten- a net beim Transportminister leit, kann ech Iech keng Äntwert ginn a bieden Iech se un de Claude Wiseler wieder ze ginn.

Ech wënschen Iech nach e schéinen Dag.

Lucien LUX
Transportsminister

Här ,

Merci fir Är Zousazfro zu de Wandturbinnen.

Grad wéi um Mier ass et och zu Lëtzebuerg esou, dass Wandturbinnen do opgestallt gi, wou et sech am beschten eegent. Also och do wou de Wand am meeschte bléist.

Viru Joeren ass an dem Sënn vun der "Agence de l’Energie” e Wandatlas realiséiert ginn.

Et ass also net esou, dass d’Politiker sech keng Gedanken iwert d’Rentabilitéit géinge man. Et ass jo och am Interessi vun deenen déi eng Wandturbinne bedreiwen, dass dat sech rentéiert, well soss géing se net gebaut ginn.

Zu Ärer Zousazfro:

Mir können eis net nëmmen alleng dorop verloossen, Wandparken um Mier ze finanzéieren. Engersäits well mer selwer mussen national Efforten maan fir eis Zieler ze erréchen. Anerersäits well déi betraffe Länner esou Projeten selwer realiséieren.

An och do hun verschidde Leit ee Problem domatten, dass si hier Landflächen oder Plaze bei der Küst fir eis sollen zur Verfügung stellen, well mir bei eis esou Anlagen net schéi fannen. En plus ginn et jo och zu Lëtzebuerg Leit déi mat dëser Viergoensweis hier Problemer hunn.

D’Regierung ass sech awer bewosst, dass mir een Ziel vun 11% erneierbaren Energië bis 2020 nëmme ganz schwéier aleng duerch national Mesurë kennen erreechen. Aus dem Gronn sin mir a Kontakt mat Länner wéi der Belsch a Schweden fir eis u Wandparken do ze bedeelegen. Och d’Cegedel investéiert a Wandparken am Ausland.

Mat bëschte Gréiss,

Lucien LUX

Emweltminister

Här ,

Dir hutt eng Fro zum Sujet vun den Invalide- bzw. Seniorekaarten u mech gestalt.

Déi Leit déi duerch een Zertifikat vum Dokter beluegt kritt hunn, datt si een Handicap hunn, kënne sech beim Inneministère eng Invalidekaart ufroen. Mat dëser Kaart hun si am ëffentlechen Transport zwee Avantagen: Si hunn éischtens Urecht op déi fir si reservéiert Sëtzplaze an zweetens ass hir Invalidekaart och gülteg als valabelen Titre de transport am gesamte Réseau vum lëtzebuerger ëffentlechen Transport. Den Handicap an de soziale Status bzw déi ekonomesch Situatioun vun de Besëtzer vun enger Invalidekaart stinn a kenger Relatioun. Et gi sécherlech Leit déi am Besëtz vun enger Invalidekaart sinn, a kee groussen Handicap hunn, mee et besti vun der Säit vum Transportministère keng Kontrollméiglechkeete fir ee Certificat médical a Fro ze stellen.

Fir dësem Phenomen entgéint ze wierken a fir deenen eelere Leit den Zougang zum ëffentlechen Transport ze erliichteren ass am Joer 2007 d´Seniorekaart agefouert ginn. Wéi den Numm schonns verréit ass des Joereskaart fir Leit déi den Alter vun 60 Joer erreecht hunn. D´lescht Joer hu bal 7000 Leit vun dëser Kaart profitéiert.

Mat beschte Gréiss
Lux