Manuel Huss (Déi Gréng)

Kandidat EU-Walen 2009
Dieses Profil dient zu Archivzwecken, eine Befragung ist nicht mehr möglich.

Léif Madame ,

´Doudesstrof ass duerch den Artikel 2 vun der europäescher Grondrechts-Charta verbueden:

(1) Jede Person hat das Recht auf Leben.
(2) Niemand darf zur Todesstrafe verurteilt oder hingerichtet werden.

Duerch de Vertrag vu Lissabon get fir d´éischte Kéier ausdrécklech en absolute Verbuet vun der Doudesstrof an d´Vertragsrecht vun der EU opgeholl. Zousätzlech dozou ass se duerch den Zousazprotokoll 13 vun der europäescher Menscherechtskonventioun (2006 zu Lëtzebuerg ratifizéiert) souwuel a Friddens- wéi och a Krichszäiten verbueden. Doriwwer eraus sinn ech der Iwwerzeegung, dass déi beschte Garantie géint Doudesstrof a fir de Respekt vun de Mënscherechter an der Förderung vum humanistesche Weltbild leit: nëmmen eng Gesellschaft, där hir Bierger aus philosophescher Iwwerzeegung géint Doudesstrof sinn, kann laangfristeg eng human Politik am Interessi vun de Mënscherechter garantéieren. Dofir setze mir Gréng eis an säit et eis get, a mir wäerten dat och an Zukunft man.

Är Fro weist awer och wéi noutwenneg et ass, d´EU méi transparent ze gestalten. Ech ginn Iech 100% Recht wann Dir sot, et wier eng Qual, deen Vertrags-Text ze liesen. Mir brauchen eis do och guer net ze wonneren, wann d´Leit net begeeschtert sinn vun der Europäescher Unioun, se mecht et dem Bierger effektiv net grad einfach, verstanen ze ginn.

An awer schwätzen ech mech fir de Vertrag vu Lissabon aus. Wisou? Zwar ass deen Vertrag alles anescht ewéi de nec plus ultra, trotzdem ass e par rapport zum aktuell gültege Vertrag vu Nizza e klenge Schratt no fir. Dat virun allem, well e nieft de néidegen institutionelle Reformen d´EU och e Stéckelchen méi demokratesch mecht. D´Kompetenzen vum europäesche Parlament, dat als eenzeg europäesch Institutioun direkt vum europäesche Bierger gewielt get, gi gestäerkt. Dëst ass am Verglach zum Vertrag vu Nizza eng besser Ausgangsbasis fir an Zukunft e soziaalt, nohaltegt, transparent a virun allem demokratescht Europa ze schafen, an domat d´Viraussetzung fir en Europa am Interet vum Bierger. De Lissabon-Vertrag ass an deem Sënn awer just eng kleng Etappe vu villen, déi folge mussen.

Léif Gréiss,

Manuel Huss

Léiwen Här ,

Dir hutt eng ganz vaste Fro gestallt, erlaabt mer et dofir, een Aspekt eraus ze picken, deen mir als Politikstudent besonnesch um Häerz leit. Vun allem, wat een un der EU bemängele kann, ass et a mengen Aen den Demokratiedefizit, deen de gréisste Problem duerstellt. D´Europäescht Parlament ass déi eenzeg Institutioun, déi direkt vum europäesche Bierger gewielt get, an déi gläichzäiteg awer leider och par rapport zum Conseil, deen d´Interessien vun de nationale Regierunge vertrëtt, net genuch matschwätzen kann.

De Lissabon-Vertrag bréngt an deem Kontext e puer Verbesserunge mat sech. Sou get zB. D´Matbestëmmungsrecht vum Parlament op méi Politikfelder ausgedehnt, weider get och d´Roll vun de nationale Parlamenter an der EU gestäerkt, an am Ministerrot soll méi mat qualifizéierte Majoritéiten a manner mat nationale Vetoen geschafft ginn. Dëst si Mesuren, déi den Demokratiedefizit sécherlech net ganz behiewen (leider ass weiderhin nach ëmmer keen Initiativrecht fir d´Parlament virgesin), mee déi awer ganz kloer an déi richteg Richtung weisen. An deem Sënn betruechten ech Lissabon als eng Tëschenetapp.

Eng méi demokratesch Unioun ass fir mech d´Viraussetzung fir an Zukunft a) iwwerhaapt eng konsequent a glafwierdeg sozial, ecologesch a Verbraucherschutz-Politik am Interessi vum Bierger ze maachen, a keng reng Profit-orientéiert Politik am Interessi vun de Konzerner, an domat och b) der "Europa-Verdrossenheet" entgéint ze wierken.
Oder an engem Saz: De Lissabon-Vertrag - och wann en a mengen Aen ganz sécher net de nec plus ultra duerstellt - ass par rapport zum aktuell gelltege Nizza-Vertrag ganz kloer déi besser Ausgangsbasis fir an Zukunft eng méi demokratesch an transparent Politik am Interessi vum Bierger ze garantéieren.

Léif Gréiss,


Manuel Huss