Michel Erpelding (Déi Lénk)

Kandidat EU-Walen 2009
Dieses Profil dient zu Archivzwecken, eine Befragung ist nicht mehr möglich.

Gudden Owend,

Merci fir Äer Fro, ech kucke relativ kuerz awer präzis drop z´äntwerten.

Genee wéi déi Lénk sin ech grondsätzlech der Meenung, dass Europa net op ultraliberale Regele wéi dem Herkunftslandprinzip (principe du pays d´origine) kann opgebaut sin. Et gin zwou Méiglechkeeten, fir an Europa eng sozial Harmoniséirung erbäizeféieren : entweder mir gin den ambitéise, soziale Wee, a mir schreiwen länneriwwergräifend Minimumregele vir, z. B. ee proportionell zum Räichtum vun all Land definéierten europäesche Mindestloun (d. h. e Loun, deen zwar vu Land zu Land variéiert, mee den et erlaabt, am betreffende Land dezent ze liewen). Dat ass de Wee vun déi Lénk an der Europäescher Lénkspartei. Oder mir fueren esou weider wéi bis elo. D. h. mir iwwerloossen alles dem fräie Spill vum Maart, esou dass den europäesch ofgesëcherte fräie Verkéier vu Wueren, Kapital an Servicen iwwert de soziale Gesetzgebungen vun de Memberstaate steet. Genee dat mecht d´Herkunftslandprinzip: esou muss z. B. e Betriib, dee säi (vläit fiktive) Sëtz an engem aneren EU-Land huet, net méi all lëtzebuergesch Regelen am soziale Beräich anhalen, wann e bei eis an d´Land Servicer ubidde kënnt. D´Resultat dovunner ass Sozialdumping. Dat ass de Wee, den ë. A. d´CSV an d´DP wëlle goen, vu verschiddene Leit an der LSAP guer net ze schwätzen.

Fazit: Wa mer wëllen den Herkunftslandprinzip lassgin, geet et net duer, dass mer d´Bolkesteindirektiv ëmännere, well dat gesamtent EU-Recht ass mat zu Sozialdumping féirenden ultraliberale Prinzipien duerchsat. Mir mussen also déi bestehend Traité´en (y compris de wahrscheinlech geschwënn a Kraaft triedende Lissabonn-Vertrag) ofléisen duerch en Text, dee méi équilibréiert ass, an zu enger sozialer Harmonisatioun no uewe féiere kann. A fir dass dat méiglech ass, muss d´EU demokratiséiert gin.

Ech hoffen, dat heite klor an däitlech.

Mat beschte Gréiss,
Michel Erpelding (déi Lénk)

Léiwen Här ,

Merci fir Äer Fro, ech wäerd kucken, se esou kuerz wéi méiglech ze beäntwerten, mat allerdéngs enger klenger Viirbemierkung.

De sozialen Zesummenhalt (cohésion sociale) ass am Fong keng Erfindung vun der EU (en ass iwwert 100 Joer al), quitte dass e vill am europäesche Kontext benotzt gëtt. Ech hun e relativt zwiespältegt Verhältnis zu dem Begrëff, well e kann an all Richtung interpretéiert gin. Engersäits geet et hei ëm d´Fähegkeet vun enger Gesellschaft, fir solidaresch ze handelen. Dësen Aspekt vum sozialen Zesummenhang ënnerstëtze mer natierlech voll a ganz bei déi Lénk. Anerersäits beinhalt dëse Begrëff awer och eng déif konservativ Visioun vun der Gesellschaft, well e vun engem Konsens iwwert dem bestehende Wirtschaftssystem ausgeet. Dat ass den Aspekt, op dee virun allem d´CSV, d´DP an den ADR opbauen, awer och eng Rei Sozialisten a Grénger : nëmme net un de Kapitalismus fréckele goen, sech nëmme keng Froen iwwert demokratesch Alternative stellen, et kinnt ee jo mol e puer Leit wéi de Mittal seriö virun de Kapp stoussen... Mir dogéint mengen, dass bësonnesch a grousse Betriiber d´Salarié´en méi Matsproocherecht musse kréien, fir dass nieft eisem politesche System och endlech de Wirschaftssystem demokratiséiert gëtt.

Elo awer zréck zu Äerer Fro iwwert d´Frontalier´en. Wéi Der wësst, stellen déi jo iwwert en Drëttel vun eise Beschäftegten duer. Ouni sie géif also hei am Land net ganz vill lafen. Ech schwätze net nëmme vu Botzfraën an Aarbechter, mee och vun Universitairen, vun dene mer der jo bekanntlech zu Lëtzebuerg net genuch hun. Natiirlech stellt sech bei esou enger massiver Präsenz vu Grenzgänger d´Fro vun hierer Interaktioun mat der lëtzebuerger Gesellschaft. Ech mengen, dass trotz de ville Virurteeler géint si vill Frontalier´en eng Relatioun mat Lëtzebuerg hun, déi net reng ökonomesch ass. Vill vun hinne si Member a Gewerkschaften hei am Land, an huelen aktiv u Mobiliséierunge wéi der grousser Manif vum 16. Mee deel. A wahrscheinlech géifen der eng ganz Rei jo esouguer heihinner wunne kommen a méi um öffentleche Liewen deelhuelen, wann d´Baupräisser net esou onméiglech héich wieren. (Woufir et jo elo och ewell eng ganz Rei lëtzebuerger Frontalier´en gëtt...).

Egal wéi "déif" d´Relatioune vun dem engen oder anere Frontalier mat der lëtzebuerger Gesellschaft sin, mir bei déi Lénk mengen egal wéi, dass Leit, déi iwwer länger Zäit hei am Land schaffen, eng Form vu politescher Repräsentatioun mussen hun. Dat kinnt een z. B. iwwert ee vun hinne gewieltent, konsultativt Organ maachen. Esou géif och d´Solidaritéit tëscht hinnen an de Leit, déi zu Lëtzebuerg wunnen, verstärkt gin.

Allgemeng wëll ech och nach eng Kéier drun erënneren, obwuel dat elo net d´Frontalier´en betrëfft, dass mir bei déi Lénk dofir antrieden, dass all Leit, déi hei am Land (iwwert eng gewëssen Zäit) wunnen, d´Wahlrecht musse kënne kréien. Soss ass et zu Lëtzebuerg geschwënn ewéi am alen Athen, wou nëmmen eng Minoritéit vun de Leit konnt un der Demokratie deelhuelen. An d´Demokratie vun enger Minoritéit ass näischt anescht wéi eng Form vun Diktatur.
Ech hoffen, dass ech Iech op Äer Fro geäntwert hun.

Mat frëndleche Gréiss,
Michel Erpelding (déi Lénk).

Léiwen Här ,

Déi Fro, déi Dir mir hei stellt, ass net einfach. Ech wäerd awer kucken, se esou gutt wéi méiglech ze beäntwerten.

Ech huelen un, dass d´Haltung vu Lëtzebuerg zu Nordkorea a sengem Atomprogramm prinzipiell déi nämlecht ass wéi déi vun der EU insgesamt. D. h. op der enger Säit eng ganz kloer Verurteelung vun all Schrëtt vun dësem Land, sech mat Atomwaffen auszerüsten, resp. säin aktuellt balistescht a nukleart Arsenal ze testen ; op däer anerer Säit gin et allerdéngs regelméisseg Gespréicher tëscht der EU a Nordkorea, an déi meescht EU-Memberstaaten ënnerhalen (low-profile) diplomatesch Relatioune mat Nordkorea. Zanter 1996 huet d´EU och iwwert 360 Milliounen Euro un humanitärer Hëllef (Iessen, Medikamenter, technesch Hëllef ë. A. wat Ofwasser ugeet) an dat Land geschéckt. Ech fannen dat on net illegitim. Well wann dat net géif geschéien, géife Millioune Leit dohannen den Hongerdout stierwen. An dat ass moralesch ne ze veräntwerten.

Den aktuelle Schlamassel mat Nordkorea hu mer och zu engem gudden Deel der Bush-Administratioun ze verdanken, déi mat hierem krichsdreiwereschen Discours nëmmen dozou bäigedroen huet, dass Nordkorea säi Nuklearprogramm beschleunegt huet. Ënnert dem Bush hu nämlech verschidde Leit an Amerika haart driwwer nogeduecht, ob een a Nordkorea net sollt dat nämmlecht maache wéi an 2003 am Irak, nämlech eng militäresch Invasioun. Dat wor natierlech net bësonnesch subtil, an de Kim Jong-Il hat dunn e gudde Grond, sech nuklear opzerüsten - d´Bomm gewëssermoossen als Liewensversëcherung géint eng westlech Invasioun. Dat ass iwwregens keen Eenzefall: kuckt nëmme, wat Israel an de 50er Jore gemaach huet, Indien an de 70er, Pakistan Enn 90er Joren an den Iran haut... E Land, wat d´Bomm huet, gräift kee méi esou gäeren un, wéinstens an der Theorie.

Elo awer rëm zréck zu Äerer Fro. Dir schéngt ze mengen, dass humanitär Sanktioune kinnten dozou bäidroen, dass d´norkoreanesch Bevölkerung sech géing géint de Kim Jong-Il rebelléieren. Dat schéngt mer net bësonnesch realistesch, mee éischter geféierlech. Ech hu mech während menge Studien am droit international regelméisseg mat der Fro vun internationale Sanktiounen ausernee gesat. D´Efficacitéit vun dësem Instrument - bësonnesch géint Diktaturen, déi gutt organiséiert sin a wou e staarkt Nationalgefill besteet - gët ëmmer méi a Fro gestallt. Kuckt emol, wéi dat am Irak gaangen ass: nom Golfkrich wor d´Iddi opkomm, de Saddam Hussein duerch Sanktiounen ze stierzen oder wéinstens esou ze schwächen, dass en sech vum selwen der internationaler Gemeinschaft gefügt hätt. Dee Schoss ass total no hanne lassgaang: während 12 Joer sin duerch déi Sanktiounen honnertdausenden Irakien, dorënner bësonnesch vill Kanner, gestuerwen. A wéi d´Amerikaner zu Baghdad ukomm sin, goufen se dowéinster och net grad mat Blummen empfaangen... De Saddam gouf bis zum Schluss vu ville Leit ënnerstëtzt: si soten sech, dass ënnert him, an den 80er Jore virun allem, den Irak dat wäit entweckelste Land an der ganzer arabescher Welt wor, mat (materielle) Liewenskonditioune wéi am Westen. An déi goufe duerch d´UNO-Sanktiounen, bal méi nach wéi duerch d´US-Invasioun, total zerstéiert. Wëlle mer dat nämmlecht a Nordkorea? Ech op jiddfer Fall net!

Ech mengen och, dass een amplaz unilateral viirzegoen, sollt op d´Meenung vun den direkte Nopere vu Nordkorea agoen, notamment vu Japan, China a virun allem Südkorea. An déi wëllen nun emol keng brutal Sanktiounen, déi Nordkorea zu Verzweiflungsaktiounen kinnte bewegen. D´Chinese schéngen ëmmer méi genervt ze sin duerch dem Kim Jong-Il seng Onberechenbarkeet, a kinnten dowéinster a nächster Zukunft méi Drock op hien a säi Regime ausüben. D´EU kinnt vläit kucken, sech un de sougenannte "6-Parteie-Gespréicher" (Nordkorea, Südkorea, China, Japan, Russland, USA) ze bedeelegen. Mee d´EU kann do nëmme kredibel sin, wann et aussepolitesch mat enger Stëmm schwätzt. An dat ass nëmme méiglech, wann Europa sech an eng demokratesch politesch Entitéit verwandelt. Dofir triede mir bei déi Lénk méi staark an wéi soss keng aner Partei.

Ech hoffen, ech hun Iech domadder op Äer Fro geäntwert.

Mat beschte Gréiss,
Michel Erpelding (déi Lénk)

Léiwen Här ,

Merci fir Äer Fro, ech wäerd kucken, meng Äntwert mat konkrete Beispiller z´illustréiren.

Dir hutt Recht: den Ament betount praktesch all Partei, dass an Europa déi wirtschaftlech Fräiheeten net dierften iwwert de soziale Rechter stoen. Mee da muss een och kucken, wat si di lescht Joren iwwer gemaach hun!

Ech gin Iech zwee Beispiller, well se mer am frappanteste schéngen:

1. Am Europaprogramm vun der CSV steet, dass si dofir wieren, "dass sich die wirtschaftlichen Grundfreiheiten und die sozialen Grundrechte die Waage halten" - eng glat Ligen, wann ee bedenkt, wat hier Leit tatsächlech um europäesche Niveau maachen!

Kuckt emol hier Europalëscht: d´Tête de liste ass keen anert wéi d´Viviane Reding, wat déi lescht Joren an der neoliberaler Kommissioun vum José Manuel Barroso soutz an däer hier Politik matgedroen huet. Innerhalb vun der Kommissioun huet d´Madame Reding och meeschtens mam neoliberale Fligel vun de Kommissären ofgestëmmt. Iwwregens, wann een hier déi Fro stellt, an dat weess ech aus egener Erfahrung, reagéiert si ganz gereizt, well si weess sech net fräi.

An dann d´Astrid Lulling! Sie huet et dach tatsächlech fäerdegbruecht, géint déi ofgewässert Versioun vu Bolkestein ze stëmmen - net, well dës hier net sozial genuch wor, mee well hierer Meenung no den ultraliberalen Esprit vun der éischter Versioun vum Text net méi präsent wor... Zu Stroosbuerg stëmmt si iwwregens regelméisseg géint sozial Texter.

Doriwwer eraus ass d´CSV Member vun der Europäescher Vollekspartei (EVP), an déi huet an hierem Programm ganz aner Saache stoen. Do steet nämlech dat Sozialt nëmmen als allerlescht Prioritéit, op enger hongreger halwer Säit. An do get da virun allem vun enger "flexiblere Arbeitsorganisation" vun de Salarié´e a vu "Förderung der unternehmerischen Initiative" geschwat, wat net grad op grouss sozial Ambitioune schléisse léisst.

Fazit: net de Leit hier Versprieche kucken, mee dat, wat se wierklech gemaach hun. Bei déi Lénk, wou vill Leit aus dem Gewerkschaftsmilieu kommen, ass d´Sozialpolitik iewescht Prioritéit, an dorunner wäerd sech näischt änneren.

2. Och d´LSAP trëtt fir e méi sozialt Europa an. Et ass och wouer, dass hieren Deputéierten, de Robert Goebbels - wann e net grad fir d´Chemiesindustrie oder d´OGM´en antrëtt - mam soziale Fligel vun der Partei vun den Europäesche Sozialisten (PES) ofstëmmt. Mee wann een dat konfrontéiert, mat deem, wat d´LSAP um nationale Niveau mecht, mierkt een, dass do net vill Kohärenz besteet. Kuckt emol de Nicolas Schmit: wéi hien zu Bréissel Ambassadeur fir Lëtzebuerg bei der EU wor, huet hien sech fir d´Bolkestein-Direktiv agesat. Dat nämlecht gëlt fir de Jeannot Krecké, den absolute Fetichist vum Neoliberalismus an der LSAP, den am Géigesaatz zum Här Goebbels fir eng "selektiv Sozialpolitik" (sic!) antrëtt. An och wann de Robert Goebbels am Europaparlament oft genuch d´Onofhängegkeet vun der Europäescher Zentralbank kontestéiert huet, hun déi meescht national LSAP-Politiker dës Onofhängegkeet stillschweigend respektéiert, mat de Konsequenzen, déi mer elo gesin...

Bei déi Lénk get et keng Kontradiktiounen tëscht dem nationalen an dem europäesche Niveau: dat, wat am Europaparlament vun der Vereenegter Europäescher Lénker (United European Left, 41 Députéiert, jhust 2 manner wéi déi Gréng) décidéiert get, entsprëcht och vollends deem, wat mir um nationale Plang vertrieden. Dofir hei meng Meenung: wee wëll sozial konsequent wielen, dee muss déi Lénk wielen.

Voilà, ech hoffen, dass Iech déi Beispiller uspriechen.

Mat frëndleche Gréiss,
Michel Erpelding (déi Lénk)

Léiwen Här ,

Merci fir Äer Froen, déi ech hei mat e bësse Verspéidung beäntweren:

1. Mir sin den Ament ganz kloer an enger Déifphase vun der Konjunktur, dorunner besteet keen Zweifel. Ob a wéini mer aus der aktueller Kris erauskommen, dorobber kann ech Iech net äntweren, soss wier ech elo Millionär (quitte dass dat net mäin Ziel am Liewen ass). Mee woubäi ech mech mer ganz sëcher sin, dat ass, dat déi heite Kris net jhust eng kleng konjonkturell Kris, mee eng Systemkris ass, net nëmme vum Neoliberalismus, mee och vum Kapitalismus allgemeng. Z.B. muss ee menger Meenung no de Konzept vu Wuesstum ganz a Fro stellen (cf. och den interessanten Artikel doriwwer an der "Zeit" vun der leschter Woch). Wa mir seriö wëllen iwwert déi Kris ewechkommen, da kënne mer net mat engem System weiderfueren, wou 27 Länner all hier ege Wirtschaftspolitik maachen. Mir brauchen eng europäesch Wirtschaftsregiirung, déi demokratesch legitiméiert ass. Alles dat erlaabt de Lissabonvertrag NET. Dofir trëtt déi Lénk an d´United European Left am Europaparlament jo och fir e neit Grondgesetz fir Europa an, net jhust aus Agitatioun!

2. Ech si grondsätzlech dofir, dass d´Leit sollen d´Méiglechkeet hun, net zevill wäit vun hierer Aarbechtsplaatz ze liewen. Dat implizéiert z. B., dass Wunnquartieren net hermetesch vu Gewerbequartieren getrennt gin (ech schwätze net vun Industriezonen hei!). Dat ass awer leider vill zevill oft zu Lëtzebuerg de Fall, wou d´Landesplanung total versot huet. Vergläicht emol de Garer Quartier mat der Uewerstad a mam Kierchbierg. Menger Meenung stellt den éischten e gudde Mix aus Wunnengen a Gewerbe duer, während déi an der zweeter praktesch nëmme nach Kleederbuttécker a Yuppiescafé´en stin. Um Kierchbierg gin op däer enger Plaatz riiseg Banken, EU-Institutiounen an Hotele gebaut, an op aneren, hermetesch dovunner getrennte Plaatzen, e puer Wunnblocken. Dat ka menger Meenung no net opgoen. Belval fannen ech do z. B. schons vill méi interessant als Konzept. A fir déi Leit, déi ze wäit vun hierer Aarbecht wunnen, fir zu Fouss oder mam Velo dohinner ze fueren, muss et natierlech e bëllegen an effizienten öffentlechen Transport gin. Do gouf zu Lëtzebuerg vill verpennt (merci DP a Stater Geschäftsverband...!). Ech hoffe jhust, dass mer den Tram elo endlech gebaut kréien!

Mat beschte Gréiss,
Michel Erpelding (déi Lénk)