Michel Erpelding (Déi Lénk)

Michel Erpelding
Joergang
1984
Berufflech Qualifikatioun
Diploméierte Jurist (spezialiséiert am droit international)
Ausgeübte Professioun
Student (droit international), Paris-I Panthéon-Sorbonne
Uertschaft
-
Walkrees
Europa
Landeslëschteplaatz
keinen
(...) Engersäits geet et hei ëm d´Fähegkeet vun enger Gesellschaft, fir solidaresch ze handelen. (...) Anerersäits beinhalt dëse Begrëff awer och eng déif konservativ Visioun vun der Gesellschaft, well e vun engem Konsens iwwert dem bestehende Wirtschaftssystem ausgeet. (...) Ech mengen, dass trotz de ville Virurteeler géint si vill Frontalier´en eng Relatioun mat Lëtzebuerg hun, déi net reng ökonomesch ass. (...) Egal wéi "déif" d´Relatioune vun dem engen oder anere Frontalier mat der lëtzebuerger Gesellschaft sin, mir bei déi Lénk mengen egal wéi, dass Leit, déi iwwer länger Zäit hei am Land schaffen, eng Form vu politescher Repräsentatioun mussen hun. (...)
 
Froen un Michel Erpelding
Noriicht u folgend Adress schécken soubal eng Äntwert antrëfft


Die Datenschutzbestimmungen zur Behandlung meiner Daten habe ich gelesen.
Bitte loggen Sie sich hier ein.
Fro zum Thema Demokratie an Biergerechter
01.06.2009
Vum:
Zoë Muller

Léiwen Här Erpelding,

Wéi stidd dir zur Idee vun enger Kulturflatrate, also enger Taxe, déi ee pro Mount/Semester/Joer op säin (Breetband)-Internet-Access bezilt an déi engem dofir erlaabt, legal File-Sharing ze bedreiwen?

Ech denken daat et sech géif ubidden esou eppes op europäeschem Niveau anzeféieren, evtl. och mat engem Portal fir europäesch Museker/Filmer gezielt ze förderen, andeems een hier Musek do liicht kéint fannen an eroflueden.

Wann der méi wëllt gewuer ginn iwwert Kulturflatrate kann ech iech nëmmen dëse Podcast vun Netzpolitik.org, iwwregens eng ganz gutt Säit iwwert alles wat Internet an Politik ungeht, un d´Häerz lee: netzpolitik.org
Do ged och op eventuell Modalitéiten(Wéi ginn d´Downloads gezielt, ween kritt wéi vill Suen, etc.) vun esou enger Kulturflatrate a gaangen.

Elo gëtt et eng reell Chance dat déi schwedesch Piratepartei ee Setz am Europaparlament wäert kréien. Wéi gesitt dir déi Entwécklung? Hunn aner Parteien d´Entwécklungen am Internet verschlof?

Merci am Virraus fir är Äntwert!
Äntwert vum Michel Erpelding
bis elo kengRecommandatiounen
05.06.2009
Michel Erpelding
Léif Madame Muller,

Merci fir Äer Fro.

Ech si grondsätzlech der Meenung, dass Kultur en allgemengt Gutt ass, wat esou breed zougänglech wéi méiglech sollt sin. Do bidd den Internet natierlech Méiglechkeeten, vun dene mer virun e puer Joer jhust konnten dreemen.
Wat elo Filesharing ugeet, sou sin ech der Iwwerzeegung, dass mer bei dene meeschte Siten am Beräich vum legale "private usage" sin, vu dass déi Leit, déi do hier Date mat anere Leit deelen, keng Profiter domadder maachen an hier Filmer, Clips, Muséksstécker, etc., och net öffentlech viirféieren. Fir mech ass dat also vum Prinzip hier absolut legal. Ech hun och nach virun e puer Méint mam Professor Thomas Cottier, dee bei der WTO (OMC) schafft an un de Negotiatioune vum kontestéierte TRIPS-Accord (Agreement on Trade-Related Aspects of Intellectual Property Rights) deelgeholl huet, iwwert déi Fro diskutéiert. Quitte dass ech soss a ville Saache net mat dem Prof. Cottier d´accord sin, wor hien och der Iwwerzeegung, dass Filesharing absolut net géint déi international Bestëmmungen iwwert d´propriété intellectuelle verstéisst. Allerdéngs gesin eng Rei Staaten (z. B. Frankräich) dat net esou, a wëllen dat elo stroofbar maachen, sief et op Käschte vun der Privatsphär vun de User´en (cf. déi berühmt-berüchteg "loi Hadopi"). Dat ass a mengen Aen eng geféierlech Entwécklung.

Wat d´Kulturflatrate ugeet, sou fannen ech, dass se zwar interessant Usätz bidd, awer nach laang net all aktuell Problemer, déi ech virdrun ugeschat hun, léist. Interessant ass, dass se op däer enger Säit den Austausch vun intellektuellen an artistesche Wierker géif erhéigen, an op däer anerer Säit et gläichzäiteg géif erlaben, dass Auteuren oder Kënschtler, déi net vu Publicitéit, Concert´en oder produits dérivé´en kënne liewen, nach ëmmer en Akommes hätten.

Mee dëse System huet och eng Rei Nodeeler :
  • wann een alleng vun der Zuel vun Downloads ausgeet, da gi Kënschtler, déi méi Zäit a Geld an d´Kreatioun vun hiere Wierker stiechen, géigeniwwer vu Mainstream-"Artiste" wéi Britney Spears, etc., benodeelegt;
  • och de Problem mam Dateschutz ass heimadder net onbedéngt geléist, quitte dass et besser ass, wéi déi aktuell repressiv Approche.

Dofir bleiwen ech alles an allem relativ skeptesch. Ech mengen awer, dass et gutt wier, wann een dës Fro géif no de Wahlen méi am Detail am Europaparlament géif debattéieren.

Wat d´Piratepartei ugeet, sou wënschen ech hinne vill Gléck an hierem Kampf géint déi grouss Labelen. Ech fannen et ass gutt, dass se de Problem vum Konflikt tëscht dem klasseschen Urheberrecht an dem fräien Austausch vun Informatiounen am Internet-Zäitalter thematiséiert hun. A wa se éiere sollten an d´EU-Parlament gewielt gin, kinnten se sech jo iwwerleeën, fir bei der Fraktioun vun der United European Left matzemaachen, well mir allgemeng relativ no vun hieren Iddien stin.

Mat beschte Gréiss,
Michel Erpelding (déi Lénk)
X
Äntwert recommandéieren
Fro zum Thema Demokratie an Biergerechter
05.06.2009
Vum:
Max Doerner

Leiwen Här Erpelding,

den Wonsch no mei Demokratie an den Institutionen vun der E.U. ass jo een vun ären Haaptpunkten, wann net den Haaptpunkt an der Europapolitik. Souwei sech daat unheiert hudd dir och ganz konkret Virstellungen wei een daat duerchzesetzen keint. Huelen mir mol un dir geift an d´Parlament gewielt gin, waat geif dir dann machen?

Matt beschten Greiss,
an weiderhin vill Erfolleg

Max Doerner.
Äntwert vum Michel Erpelding
3Recommandatiounen
05.06.2009
Michel Erpelding
Léiwen Här Doerner,

D´Demokratiséierung vun der EU ass eng vun eisen Haaptfuerderungen. D´EU funktionéiert nämlech schons haut deels wéi e Föderalstaat, jhust dass dëse Staat eben net demokratesch ass. Eis Fuerderung ass och keng utopistesch Dreemerei, mee eng realistesch a konkret Äntwert op d´wirtschaftlech an demokratesch Kris, an däer mer eis den Ament befannen. Net vergiessen : mir sin haut an Europa méi staark mateneen integréiert, wéi d´amerikanesch Kolonien zum Zäitpunkt, wou se d´US-Verfassung ausgeschafft hun.

En demokratescht Europa setzt d´Ausschaffe vun engem neien Grondvertrag (oder enger Verfassung) fir d´EU viraus. Dofir triede mir bei déi Lénk a bei der europäescher Lénkspartei och an. Vum institutionelle Standpunkt misst dat neit Gefüge a groussen Zich esou funktionéieren:

  • d´EU-Parlament, déi eenzeg direkt vun de Bierger gewielten Institutioun, misst an alle wichtege Froen dat lescht Wuert kënnen hun. Dat gëlt géigeniwwer vun der Kommissioun a vum EU-Ministerrot genee esou wéi virum europäesche Geriichtshaff, dem seng Urteeler d´Parlament noutfalls muss kënnen duerch Gesetzer réckgängeg maachen, genee wéi dat an de Nationalstaaten de Fall ass.
  • d´Kommissioun muss zu enger Form vun demokratescher Regiirung vun Europa gin. Si muss dofir direkt aus dem EU-Parlament erviirgoen. Dat setzt och viraus, dass déi europäesch Parteien vun Ufank u mat eegene Kandidate fir an d´Kommissioun untrieden, genee wéi dat z. B. zu Lëtzebuerg bei de Chamberwahlen de Fall ass. Da wäerd et och net méi méiglech sin, dass d´halschent vun de Sozialisten an Europa fir de Barroso antrieden, esou wéi dat haut de Fall ass.
  • de Ministerrot muss zu enger Zort Senat fir d´EU-Staate gin, wou déi eenzel Länner hier Interesse vertrieden an d´Anhale vum Subsidiaritéitsprinzip iwwerwaache kënnen, ouni awer elo de Pouvoir ze hun, fir ëmmer alles ze blockéieren.
  • den Europäesche Geriichtshaff muss dat bleiwe wat den ass, nämlech dat iewescht Geriicht vun der EU. Seng Pouvoire mussen awer vun den demokratesch gewielten Organer, a bësonnesch vum EU-Parlament, kënne kontrolléiert gin.
  • d´Europäesch Zentralbank (EZB) muss der politescher Kontroll vum Parlament ënnerstallt gin a virun him responsabel sin.
  • generell misst déi föderal EU staark dezentraliséiert sin. Dat ass ganz gutt an enger Föderatioun méiglech, op jiddfer Fall besser a mat manner Konflikter wéi am aktuelle System vun de Nationalstaaten.

Dat hei kléngt elo alles wéi Zukunftsmusék. Ech stellen awer fest, dass mer den Ament schons dorobber zousteieren, jhust dass nach keen (ausser déi Lénk an d´europäesch Lénkspartei) et wëllt riskéieren, fir dovunner ze schwätzen. Mee grad dat ass geféierlech, well ouni eng demokratesch a pluralistesch Diskussioun wäerte mer dëst Ziel net realiséiert kréien. Dofir ass et wichteg, dass och déi Lénk an der Chamber an am EU-Parlament vertrueden ass.

Mat beschte Gréiss,
Michel Erpelding (déi Lénk)
X
Äntwert recommandéieren
Fro zum Thema Internationales
05.06.2009
Vum:
Jean Paul

Wéi stitt dir zum evtl. Bäitrëtt vun der Türkei an d´EU?
Äntwert vum Michel Erpelding
1Recommandatioun
06.06.2009
Michel Erpelding
Léiwen Här Jean-Paul,

Merci fir Äer Fro.

Déi Lénk ass grondsätzlech fir eng oppen EU, wou all Länner, déi bereed sin, zu engem gemeinsamen, demokrateschen a solidareschen Europa bäizedroen, wëllkomm sin. Dat gëlt och fir d´Tierkei, déi säit 1963 (!) an den europäeschen Eenegungsprozess mat agebonnen ass. Dëse Prozess kann ee net méi réckgängeg maachen, dat wier nämlech eng immens Humiliatioun fir d´Tierken an e monumentalen aussepolitesche Fehler vun der EU, den eiser Kredibilitéit an eisem Gewiicht an der Welt géif immens schueden.

D´Argumenter, vun denen, déi géint esou e Bäitrëtt sin, kënne mer net deelen. Si schéngen eis och geféierlech.
1. Dat geographescht Argument ("d´Tierkei läit net an Europa, mee haaptsächlech an Asien") ass Blödsinn. Haut huet d´EU schons gemeinsam Grenzen mat Brasilien, duerch de franséischen Département vun der Guyane.
2. Dat reliéist-kulturellt Argument ("Mosleme gehéiere net an d´EU") ass och ze verwerfen. Et berout of rassisteschen an islamophobe Virurteeler. Net nëmme gin et am Häerz vun Europa aner Länner, wou eng Majoritéit (Bosnien-Herzegovina, Albanien) oder eng grouss Minoritéit (Frankräich, England, Däitschland) vu Mosleme liewen. Mee et duerf een och net vergiessen, dass d´Tierkei e Land ass, wou d´Laizitéit grouss geschriwwe get, vläit esouguer op eng e bëssen ze strikt Art a Weis, wat och rezent Entwécklungen a Saache Liberaliséierung vun der Ausübung vu Reliounen dohannen erklärt. Déi Lénk ass eng laizistesch a virun allem antirassistesch Partei, an dofir stousse mir eis net dorun, dass e majoritär muslimescht Land an d´EU kënnt. Dat kann eiser Meenung no nëmme förderlech sin, fir de Laizismus um europäesche Niveau ze verstäerken.
3. Dat pseudo-humanitärt Argument ("d´Tierkei verstéisst massiv géint Rechter vun de Minoritéiten") ass pur Hypokrisie. Éischtens kann een dat nämlech vu villen EU-Memberstaate soen : kuckt emol nëmme, wéi d´Italiener an d´Rumäne mat de Rom´en ëmgin... Dat erënnert un d´30er Joren. Zweetens huet d´Tierkei - grad wéinst hiere Verhandlunge mat der EU! - eng ganz Rei Fortschrëtter a Saache Mënscherechter an Demokratie gemaach : Liberaliséierung vun der kurdescher Sprooch, op Äis leën vun der Doudesstrof, Démantèlement vun antidemokrateschen Verschwörungszirklen innerhalb vun der tierkescher Arméi...

Wann e Land wëll an d´EU erakommen, op Island oder d´Tierkei, musse menger Meenung no folgend Konditioune respektéiert gin:
  • Respekt vun Demokratie a Mënscherechter. Dat ass souwisou Deel vun de langwieregen an détailléierte Verhandlungen, déi d´EU-Kommissioun mat de Bäitrëttskandidate féiert.
  • E wirtschaftlechen a soziale Masterplang, den d´Integratioun vun dene Länner an d´EU erliichtert. Dat wor z. B. mat den osteuropäesche Länner net genuch de Fall. Si kruten zwar e bësse Suen vun der EU, mee hier (net-)Integratioun ass haaptsächlech iwwert Sozial- a Steierdumping gemaach gin, well den EU-Budget en général net héich genuch ass. Doduerch hun se elo mat der Kris keng Ressource méi, a musse Suen bei den FMI léine goen. Dat ass e Skandal an eng Schan fir Europa.
  • Eng weider politesch Verdéiwung vun der EU. Mat Länner, déi d´EU jhust als eng Fräihandelszon ugesin, kënne mer näischt ufänken. Dofir ass et urgent, dass mer der EU e neien, demokrateschen a soziale Grondvertrag (oder eng Verfassung, de Numm ass nach egal) gin. An zwar esou bal wéi méiglech. Och dofir ass et néideg, d´europäesch Lénkspartei um europäeschen Niveau an déi Lénk um nationale Plang ze stäerken, well mir sin déi eenzeg politesch Kraaft, déi resolut fir esou eng Neigrënnung vun Europa antrëtt.

Ech hoffen, meng Äntwert stellt Iech zefridde.

Mat beschte Gréiss,
Michel Erpelding (déi Lénk)
X
Äntwert recommandéieren
Fro zum Thema Demokratie an Biergerechter
06.06.2009
Vum:
Luc Ramponi

Léiwen Här Erpelding,

D´LSAP huet an hirem läschte Bulletin geschriwwen dat all Stemmen fir Déi Lénk verlueren Stemmen sinn.

Vierwat ass eng Stemm fir Déi Lénk eng netzlech Stemm?
Äntwert vum Michel Erpelding
1Recommandatioun
06.06.2009
Michel Erpelding
Léiwen Här Ramponi,

Merci fir Äer Fro. D´Erpressungsargument vum "vote utile", mat dem d´LSAP elo geschärt get, fannen ech nëmmen absurd. Inwiefern soll et da "nëtzlech" sin, fir d´Sozialisten ze stëmmen, wa si an dene leschte Joren um ganze Prozess vun der Liberaliséirung a vum Sozialofbau direkt deelgeholl hun. LSAP-Ministre wéi de Jeannot Krecké si mat déi neoliberalste Leit hei am Land, déi bis haut nach un den Doktrinen festhalen, déi d´Thatcher an de Reagan an den 80er Joren developpéiert hun, an dene mer elo dës Systemkris ze verdanken hun. Hinne Stëmme nozegeheien, fir se nach fir dës falsch Politik ze belounen, dat ass kee "vote utile", mee eng Opfuerderung, fir dass se esou weiderfuere solle wéi virdrun. Dogéint ass eng Stëmm fir déi Lénk eng Stëmm fir e méi sozialt Lëtzebuerg a fir eng Chamber, an däer erëm kontrovers iwwert sozial a wirtschaftlech Froen diskutéiert get. Dofir ass déi Lénk wielen och nëtzlech wielen.

Dat nämlech gëlt awer och um europäesche Plang. D´LSAP seet, si géif fir e méi sozialt Europa antrieden. Et ass och wouer, dass hieren Deputéierten, de Robert Goebbels - wann e net grad fir d´Chemiesindustrie oder d´OGM´en antrëtt - mam soziale Fligel vun der Partei vun den Europäesche Sozialisten (PES) ofstëmmt. Mee wann een dat konfrontéiert, mat deem, wat d´LSAP um nationale Niveau mecht, mierkt een, dass do net vill Kohärenz besteet. Kuckt emol de Nicolas Schmit: wéi hien zu Bréissel Ambassadeur fir Lëtzebuerg bei der EU wor, huet hien sech fir d´Bolkestein-Direktiv agesat. Dat nämlecht gëlt fir de Jeannot Krecké, den absolute Fetichist vum Neoliberalismus an der LSAP, den am Géigesaatz zum Här Goebbels fir eng "selektiv Sozialpolitik" (sic!) antrëtt. An och wann de Robert Goebbels am Europaparlament oft genuch d´Onofhängegkeet vun der Europäescher Zentralbank kontestéiert huet, hun déi meescht national LSAP-Politiker dës Onofhängegkeet stillschweigend respektéiert, mat de Konsequenzen, déi mer elo gesin...

Bei déi Lénk get et keng Kontradiktiounen tëscht dem nationalen an dem europäesche Niveau: dat, wat am Europaparlament vun der Vereenegter Europäescher Lénker (United European Left, 41 Députéiert, jhust 2 manner wéi déi Gréng) décidéiert get, entsprëcht och vollends deem, wat mir um nationale Plang vertrieden. Dofir hei meng Meenung: wee wëll sozial konsequent wielen, dee muss déi Lénk wielen.

Mat beschte Gréiss,
Michel Erpelding (déi Lénk)
X
Äntwert recommandéieren
Fro zum Thema Demokratie an Biergerechter
06.06.2009
Vum:
Jacqueline Gerten

Här Erpelding,

CSV huet op hierer Lescht eng Spetzekandidatin wou jidfereen elo scho wees dass des Persoun hoechstwahrscheinlech hiert Mandat net waert unhuelen.

Wann dir fir d´Europaparlament gewielt geift ginn, géift dir dat Mandat dann unhuelen?

Léif Gréiss
Äntwert vum Michel Erpelding
1Recommandatioun
06.06.2009
Michel Erpelding
Léiw Madame Gerten,

Natierlech géif ech dëst Mandat unhuelen! Mee ech géif virun allem kucken, fir d´Intérêt´en vun dene meeschte Leit an Europa an hei zu Lëtzebuerg anzetrieden. Net wéi d´Madame Lulling, déi systematesch all neoliberalen Text am EU-Parlament ofstëmmt, den hier déi grad esou neoliberal Barroso-Kommissioun (wou d´Madame Reding drasëtzt) dohinnergestalt huet. Och net wéi den Här Goebbels, dee fir d´Intérêt´en vun de Chemie- an d´OGMs-Industrien antrëtt.
Wielt déi Lénk an d´Europaparlament, stäerkt domadder d´Fraktioun vun der United European Left (déi schons elo esou staark ass wéi déi Gréng a se wahrscheinlech elo wäerd iwwerhuelen), an d´Europa vu muer wäerd mat Sëcherheet méi sozial an och méi demokratesch ausgesin.

Mat beschte Gréiss,
Michel Erpelding (déi Lénk)
X
Äntwert recommandéieren
Är Fro un Michel Erpelding
D'Froenfunktioun gouf entre-temps zou gemaach.